II Timoty 3:17b, “… ho vonona tsara ho amin’ny asa tsara rehetra”
Misaotra an’Andriamanitra lehibe fa tontosa antsakany sy andavany ny fotoan-dehiben’ny SAMPATI XVème izay notanterahina ny Alahady 16 Martsa 2025. Misaotra ny raiamandreny Mpitandrina sy ny biraom-piangonana , ny Mpitandrina miza-draharaha , ny raiamandreny Mpitandrina Ravalomanana mivady , ny Filoham-boninahitra Atoa Rajaonera Freddy mivady , Randrianarisoa Mina mivady , isika rehetra tonga nanotrona sy nanome voninahitra.
Notanterahina tamin’io alahady io ny fanekena mpiandraikitra anankiroa dia Cheftaine Loholona Wendie sy Cheftaine Mialy. Ny fanekena mpiandraikitra moa dia hatao ho an’ireo beazina hiantsoroka andraikitra. Tsy maintsy manaraka fiofanana izy ireo mialohan’izany. Ny mpiandraikitra dia misy karazany toy izao :
- Mpiandraikitra voronkely sy louveteaux
- Mpiandraikitra Tily sy Mpanazava
- Mpiandraikitra Mena Afo sy Tily mena
Ny fanekena dia tanterahina anaty fanompoam-pivavahana ka notarihan’ny Filoham-paritany Analamanga Afovoany sy ny birao SAMPATI Iarivo Avaradrano
Notontosaina tamin’ny io fotoana io koa ny fanokafana amin’ny fomba ofisialy ny fankalazana ny faha-75 taonan’ny SAMPATI XV. Ny andalan-tsoratra masina hita ao amin’ny II Timoty 3:17b, “… ho vonona tsara ho amin’ny asa tsara rehetra“, no nosafidian’ny Birao ho teny faneva amin’izao fankalazana izao.
Nandritra izany fotoana izany dia nampahafantarina tamin’ny mpianakavin’ny finoana ireo mpikambana mandrafitra ny Birao K75, izay tompon’andraikitra amin’ny fandrindrana sy ny fikarakarana ireo hetsika mandritry ny fankalazana:
- Filoha : RAZAFIMAMONJY Princy Tsarah
- Filoha mpanampy: RAKOTOMANGA Henintsoa
- Mpitan-tsoratra: RANAIVOSON Malala
- Mpitantsoratry ny vola: RAMANANTSOA Nirina
- Mpitam-bola: RASANDIFERA Sahondra
- Mpanolo-tsaina: RAJOELISON Lalasoa & RAVAKINIAINA Clara
Noho izany, dia antsoina ny mpikambana rehetra sy ny mpianakavin’ny finoana hanohana sy hiara-dia amin’izy ireo amin’ny fanatanterahana ny vina sy ny tanjona amin’ity fankalazana ity.
Taorian’ny fanompoam-pivavahana dia notanterahina tao amin’ny Cafetaria ESCA Antanimena ny fifampiarahabana nahatratra ny taona 2025. Fotoana feno fifaliana izany satria nisy ny fanolorana tsodrano ho an’ireo nahazo fahasoavana nandritra ny taona 2024. Anisan’izany ireo:
- nahavita fanadinana ara-panjakana,
- terabao,
- nahazo tokantrano vaovao,
- nahazo andraikitra vaovao eo anivon’ny MTEM,
- nahazo solon’anarana na “Totem”.
Nandritra ny famaranana io fotoana io dia nanamafy indray ny firaisan-kinan ‘ ny fianakaviamben ‘ ny SAMPATi XVème, ” Ho vonona tsara ho amin ‘ ny asa tsara rehetra ” Ho an ‘ Andriamanitra irery ihany ny voninahitra !
