Efa voafaritra tao anatin’ny tetiandron’ny fankalazana an’Andriamanitra noho ny faha-160 taona ny fiangonana FJKM Katedraly Analakely fa ny Alahady 12 septambra 2021 no ivon’ny fankalazana ary niseho tokoa ny voninahitr’Andriamanitra fa velona ny fiangonana.
Zava-baovao no nomanin’ny komitin’ny fankalazana tamin’io andro io satria dia natomboka tamin’ny diabe izany. Niainga teny amin’ny gara soarano ny maraina tamin’ny 8 ora ary nihazo ny trano fiangonana. Ny Mpitandrina, ny Biraon’ny Fitandremana, ny Komitin’ny fankalazana no nialoha làlana ary nanaraka tao aoriana ireo sampana, sampanasa sy fikambanana velona teto am-piangonana. Nohazavain’ny Mpitandrina RAVELOSOA Mickael ny anton’ny diabe, dia ny fijoroana vavolombelona eo anivon’ny fiaraha-monina fa velona ny fiangonana. Nisy mihintsy moa ny fiara nitarika ka nanao fanentanana isan-karazany.
Nandritra io ivon’ny fankalazana io ihany koa no notanterahina ny fiarahabana ireo Mpitandrina zanaky ny fiangonana, ny Biraon’ny Fitandremana rehetra nandalo ka nanao ny asa fanompoana, ireo mpiasam-piangonana rehetra toy ny mpandraharaha, ny mpiandry ary ny mpanadio ny fiangonana. Tsy adino ihany koa ny nankasitraka ny namorona ny hira faneva sy ny sary famantarana. Notolorana mari-pahatsiarovana daholo izy ireo noho izany.
Tantara hijanona ho an’ny fiangonana io andron’ny ivon’ny fankalazana io satria tena nomanin’ny komity ho niavaka tokoa, izany dia ho voninahitr’Andriamanitra irery ihany.
