“Ho mandrakizay anie ny voninahitr’i Jehovah ; aoka Jehovah hifaly amin’ny asany” Salamo 104, 31
Asa goavana indray no hatrehin’ny FJKM Katedraly Analakely amin’ity taona 2025 ity. Havaozina tanteraka ny trano vadim-piangonana, folo volana no farahetan’ny asa, ny 19 desambra 2025 no tokony hiverina hipetraka ao ny Mpitandrina sy ny ankohonany raha ny tetiandron’ny KTT.
Ny taona 1983 no nahavitana ny trano vadim-piangonana, izay natao hipetrahan’ireo Mpitandrina sy ny ankohonany. Trano misy rihana roa ka ny trano fisainan’ny fiangonana no farany ambany, fandraisam-bahiny sy lakozia ny rihana voalohany ary efitra fatoriana ny rihana faharoa. Mpitandrina nifandimby efatra no efa nipetraka dia ny Mpitandrina RAKOTO André, ny Mpitandrina RAVALOMANANA, Ny Mpitandrina RAZAFIMAMONJY Dina ary ny mpitandrina am-perin’asa RAVELOSOA ANDRIAMAMONJY Nomenjanahary Mickael. Trano iray mifanila amin’ny trano fiangonana izy io, azo lazaina fa mifampiankina tanteraka.
50 Taona aty aoriana dia hita fa tena antitra tanteraka ny trano, indrindra ny rihana voalohany sy faharoa.Simba daholo ireo tao hazo sy tao vy ny trano. Mitete tanteraka ny trano, orana avy any amin’ny tafo ny tranon’ny fiangonana. Ny fitaovana plomberie sy sanitaire dia efa simba avokoa, ny efitra fandroana dia rava tanteraka ny varavarankely. Nanampy trotraka ny faharatsian’ny trano ny fitsanganan’ny trano mifanila vodirindrina tao aoriana izay nanakona tanteraka ka tsy nahafahan’ny hazavana niditra intsony. Lasa misy fofona hamandoana ny trano ka raha marefo ny taova fisefoana dia mora marary.
Efa tao anatin’ny tetikasan’ny Biraon’ny Fitandremana ny hanamboarana ny trano, nanomboka ny taona 2020. Fa noho ny asa mbola nasain’ny mpitandrina RAVELOSOA Mickael natao dia niandry aloha izany. NY fanavaozana ny “façade principale ny Katedraly Analakely”sy ny “FJKM Ampandriakilandy Fiadanana” no natao laharam-pahamehana ka ny taona 2021 hatramin’ny taona 2023 no nanaovana izany. Ny volana jolay 2023 dia nisy ny fivoriana niarahan’ny Biraon’ny Fitandremana sy ny Komity Teknika Tao trano, notapahina tamin’izany fa hiroso amin’ny asa fanavaozana ny Trano Vadim-piangonana isika.
Niroso tamin’ny fanadihadiana mialohan’ny asa ny KTT ka teo no nahitana fa tsy nisy plan de feraillage ny trano vadim-piangonana. Nipoitra aza ny hevitra fa aleo manao asa fitsirihana lalina ny trano ka niantsoana ny orinasa SOCOTEC izay manana traikefa amin’ny fanaraha-maso sy fitsirihana ny tao trano. Natao arak’izany ny “sondage” ny trano, nanomboka tao amin’ny trano fisainana ka hatrany amin’ny rihana faharoa. Nanamafy ny ahiahin’ny KTT ny valiny satria tena trano tsy manana “plan de ferailage” ny trano vadim-piangonana. Tao anatin’ny valin’ny fitsirihana nataon’ny SOCOTEC ihany koa ny fangatahina asa fitsirihana ny tany hiorenan’ny trano vadim-piangonana raha mbola hahatanty hampiakarana ny rihana ny trano ka ny orinasa LG BTP no nanao an’izay. Samy nanome “avis favorable” daholo ireo orinasa ireo fa azo havaozina sy hampiana rihana ny Trano vadim-piangonana. Nisy kosa anefa ny tari-dàlana sy toromarika izay tsy maintsy harahina.
Notapahan’ny ambaratongam-pitondrana teto amin’ny FJKM Katedraly Analakely ny volana desambra 2024 lasa teo aza fa hiroso amin’ny fanamboarana ny Trano vadim-piangonana ny taona 2025. Efa nivoaka ny devis ka mitentina 294 000 000 Ar eo ny fanamboarana : hovolena fototra vaovao ny trano ary hiakatra hatramin’ny rihana efatra.
Efa manomboka ny asa ka ny fialan’ny Mpitandrina ny trano no nanombohana izany. Nitohy tamin’ny fanalana ireo fitaovana rehetra izay mahakasika ny électricité, ny sanitaire, ny plomberie, ireo varavarana rehetra….Vita izany dia harodana ny fara-tampon’ny trano, ny lavarangana sy ny efitra ambony ary midina hatreo amin’ny rihana voalohany.
